اویله باخما

دایانیر دوداغیم... دیلیم

نه بیلیم

سانکی حایاتی اوتقونورام

قیقیاجی باخیشلارینی سانسورلایندا

بو گئجه هئچ بیر شئی دوشونمه دن

سنی یاراتدیم یئنیدن

سن:

سکسی خیاللارین سولطانی

ساچلارینی کفلیلیک کیمی چیلغین

« دوداقلارینی شعیر کیمی اینجه »

گوزله رینی هوس کیمی ایسیتان یاراتدیم بو گئجه

هیکلینی موزیکدن ده دوزنلی

و اوره یینی یابان بیر مادیانا بنزتدیم

آه سنی یاراتدیم هر شئی دن اونجه

تانریدان دا بئله

و سنی سئودیم هر شئی دن چوخ

اعتراف ائديرم:

اولپه نيرم توت ياشيل وحشي گوزله ريندن

و ياشماقلانيرام ئورتوكسوز سكسي سوزله ريندن

دي بيليم، بو آخشام

هانسي معصوم پيغمبرله كفله نيب اوياجاقسان؟

و هانسي كيفير ارككه ساتاجاقسان اوتانماز هيريلداماقلاريني؟

گوزوم سو ايچمير واللاه

بير دلي تاپيليب سني بير داها سئوه بيله!

باخ نه گونه قالميسان

بير فاحشه سني بير قادين سانا بيلمير

هه ده ده م

بو محبوسلار ايچينده آزادليقلا سئويشه بيلرسن

آما هئچ واخت ياماقلايا بيلمز سن ليريك باخيشلاري سيرتيخ گوزله رينه

اوزوم اولوم سني سئومه ديم حتي بير آندا

   *   *   *

اعتراف ائديرم

من بيريسيني سئويرم آرتيق

جانيم جوم- جولوق سئوينجله دير

بوتون مولكوللاريملا تامسينيرام تورشا- شيرين سسيني

و ازبرله ييرم توم گوزلليكله ريني

كي اونودولماسين آيريليق سيناقلاريندا

آي آمان... مني اينانديرينيز بو سارسيلماز سئوگيه

قيسقانيرام آنجاق اوزومه

و سوسورام سوندان

جينقريغيم چيخا بيلمير

پامبيق اللريني هوسلي اللريمه چكنده

من بوتون ماراقلا دولاشيرام روحونا

   *   *   *

بوراسي من

اعتراف ائديرم

نسه يالنيز اوزومه خاطيردي سئويب، اوفكه لنسمده

بو منم

اولماسام نه سئومك وار، نه ده نيفرت

و آدي اينسان دييلم سويونسام بو قوجامان كلمه لري

    *   *   *

اعتراف ائديرم

اولدوردوغوم اينسانليغي داشييرام چينيمده

تابئت سيز، كفن سيز

مني پليس لره گوسته رينيز

مني سئودييم قيزا

مني تانريا

مني اوزومه گوسته رينيز

نه لر محبوس اولاجاق؟

تانري

تانري منيم اوره ييم ده اون پارادير

بير شوكولات ديريله برابر

كي سومورور بير اوشاق سئوينجله اونو

سئودام

كي گوروش تابلوسونا سكوت رسيمي چكير همشه

سانكي لالدير

و بيلمه يير دانيشيق

    *   *   *

بونلار محبوس اولاجاق

بوتون مورفين ووردوغوم خاطيره لر

كي آغريدان دليرلر اوره ييمي

دلي بير دويغو

چيلغين بير قارا خودكار

و پاسلانميش شعرلر

    *   *   *

نه لر محبوس اولاجاق؟

عصيان

قورخو

يوموشاق بير اولوم

پاستوريزه باخيشلار

گون گورمه دييم گونلر

ايگيرمي بيرينجي عصرين يارانماميش افسانه لري

قارقيشلي بير دوغوم گونو

نيفرينلي بير ياشام

و بش كلمه سوز:

" من سني چيلغين جاسينا سئوديم"

يتر داها... يتر

يالنيز بير آدايام

هر يانيم درين- درين حسرت دنيزينين سويو

من بير اوبايام

دورد بير يانيم مزار مزار اولو

داها كيمسه ايناناجاق؟!

اوره ييمده بير زيندان گووه رير

توي ائده جه يه م بو گئجه

دليله نيب سئوه جه يه م سني ودكا- ودكا

و قيلاجام ايكي ركعت كفلنمك

بو آخشام بير اتاق اكسيژن اولموسان

اوز اليمده دييل

بيلمه دن شعريمده يازيليرسان

    *    *    *

هانسي خريطه اوره ييم كيمي سيغا بيلر سني؟

هانسي سرحد اللريم كيمي سيخا بيلر سني؟

و هانسي گوزگو گوزوم كيمي گوسته ره بيلر سني؟

باخ گوزله ريمه!

باخيشلاريم سندن بير يئني ترجمه دير

و باخيشلارين اوره ييمين ديلماجيدير

ايگير مي دورد ساعات سوزجوكسن

اون ايكي ساعات ايشيق سان

اون ايكي ساعات نفس

منده ايشيقلا نفس آراسيندايام

و چكيرم باخيشيندان بير پرسپكتيو:

"ديلك...

غرور...

شهوت..."

اوچ يون ياغير گوزله رين

يالنيز قالميشام هانسي بوياقلا بوياشديريم باخيشلاريني؟!

هانسي بوياقلا؟!

ساعاتي نهيليسمه قورموشام

او هوشسوز قارقالارين قانلي باتيا كوچمه سي نه آغير قورتولدو منه

هئي؛مني اولومله دويوشمه يه بئراخديلار

قاريخديرديلار آماجلي سئوگني

بالتا چكديلر هيجانلي ياشيل باهاريما

و بوتون گونشلري سوندوردولر

گنج افكاريم اويانيب گرنه شن چاغدا

سئوگيليمين ياناقلاريني نوبار ائتمه دن

قوندارما پاييزلاري ياراشديرديلار والنتاينا

بو قودوخلار

بير آوووج سئوگيني ده چوخ گوردولر منه

آ...آه؛ داشين آتديم من بو چوروموش و اپريميش حاياتين

مني اوزومه بئراخينيز

ايستيرم اؤزومله اوزله شم!

من اولوم، بودور آتم عصرينين يوكسك اينسانليغي؟

بودور چاغداش تاريخين اركين پلانلاري؟

قابارلي اومودلاريمي يورگون چيگنيمه آتيب، گئديرم...

باشيمي باشلارا قاتيب، گئديرم...

يوخ واريمي، وار يوخوما ساتيب، گئديرم

و سانيرام كي گله جك گولومون چيخاري يوخدو كوكوندن!

ايندي منه بير ليوان سرين فلسفه وئرينيز

و بير آزجا تانري!

   *   *   *

آما سن... آي خانيم، خاتين...

سني چيخارتديم بو آغير سربلي سوزلردن

لاپ بئله سني سئويرم

كيمه نه؟!

بير اليمده كونلوم

بير اليمده چاي

لاپ بئله سني سئويرم

ني ناي ناي

و سئوگي بازاريندا، سيرتيخ اوشاقلار كيمي

كوهنه باشماقلاريمي، جوب باجوب يئره چيرپيب، اوجادان باغيريرام:

منه... سن!

منه... سن!

لاپ بئله سني سئويرم

كيمه نه؟!

نه قدر آجی باخساندا باخ...

من شیرین دوداقلارینلا حسابلاشارام

آخ...

گئديرسن مي گولوم؟

يئني بير ناز قالير بورادا

يوموق- يوموق اللرين دوشونجه مي توتدورور

يئنه ده گوزله ريمه جومورسان

اييليبده باخ اوره ييمه

نه دن تومورسان؟!

آووج- آووج اكسيژن قوجاقلاييرام

و يورقانيمدا بسلنميش خيالي بير قيز

ساريليبدي بئله بيلكله ريمه اوچ گئجه باشين

قال بير گئجه ده ساغ قولوم باليشين

      *    *    *

اويورسان قوجاغيمدا

يومورسان گوزله ريني

كيم بيلير او معصوم اويخولاريندا نه لر گئچير؟

بير صاباحا قدر دوداغيم ياناق- ياناق اوپوش ايچير

و اومور اوره ييم او آفيون بده نيندن

سونرا...

سونرا ايچيم ايچيمدن گئچير!

      *    *    *

قالخيرسان مجبورن

گئديرسن مي گولوم؟

آما بير صاباح

پرنسيسجه سينه گليرسن گوزومله ياماق تيكميش خيياواندا

سن سن مي سسين سوچوما بويله سينه تانيش؟

سوچوم؟!

نه ايسه سن

اللريم بئراخيلير خيياوانا

قوللاريم آچيلير يولون گئنيشي قدر

حياسيز- عارسيز

و قوجاغيمدا خيالي بير قيز

گئديرسن مي گولوم؟

اوچ گئجه خاطيره اويور يورقانيمدا

و بير ساعات خيال

سني آللاه گئتمه

يالنيز ... يالنيز

بير گئجه ده قال